ᐃᓪᓗᓕᕆᔨᒃᑯᑦ ᐊᓪᓚᕕᖓ ᓄᓇᕕᒻᒥ ᓈᓚᓲᖅ ᐃᓪᓗᒥᒃ ᐊᑦᑕᑐᕐᑐᖁᑎᒥᓂᒃ: ᑭᐅᒍᑎᕕᓃᑦ ᑐᖓᓕᐊᓂ ᐊᐱᕐᓱᓂᒃᑯᑦ ᖃᐅᔨᓴᕐᓂᐅᑉ ᐅᕙᖕᖓᑦ “ᖃᓄᐃᖕᖏᓯᐊᕐᓂᖅ ᐊᓂᕐᕋᒥ” ᐱᓇᓱᐊᕐᓂᒥᑦ ᓄᐃᑕᐅᔪᑦ

ᑭᐅᒍᑎᕕᓃᑦ ᐃᓪᓗᓯᓐᓂ ᑐᖓᓕᐊ ᐊᐱᕐᓲᑏᑦ ᓄᐃᑕᐅᔪᑦ: ᐃᓪᓗᒥᒃ ᐊᑦᑕᑐᕐᑐᑦ ᐱᒍᒪᔭᖏᑦ ᐱᑦᔪᑎᒋᓗᒋᑦ ᐃᓪᓗᖏᑦᑕ ᐊᕙᓗᖏᑦ.

ᖃᓄᐃᖕᖏᓯᐊᕐᓂᒥᒃ ᐊᓂᕐᕋᒥ ᐱᓇᓱᐊᕐᓂᖅ, ᓯᕗᓕᕐᑕᐅᓱᓂ ᐃᓪᓗᓕᕆᔨᒃᑯᑦ ᐊᓪᓚᕕᖓᓄᑦ ᓄᓇᕕᒻᒥ, ᑲᔪᓯᔪᖅ ᐱᕙᓪᓕᐊᓂᕐᒥᒃ ᐱᐅᓯᒋᐊᕆᓂᕐᒥ ᐃᓪᓗᐃᑦ ᖃᓄᐃᓐᓂᖏᓐᓂᒃ ᑯᐯᒃ ᑕᕐᕋᖓᓂ. ᓄᐃᑕᐅᓂᖓᓄᑦ ᑐᖓᓕᖓᑕ ᐊᐱᕐᓲᑎᓂᒃ ᑭᐅᒍᑎᕕᓃᑦ, ᑐᖕᖓᕕᓖᑦ ᐃᓱᒪᒋᔭᖏᓐᓂᒃ 115 ᐃᓚᐅᖃᑕᐅᔪᑦ, ᐱᓇᓱᐊᕐᓂᖅ ᑐᑭᓯᑎᑦᓯᕙᓪᓕᐊᔪᑦ ᐃᓪᓗᒥᒃ ᐊᑦᑕᑐᕐᑐᑦ ᐱᒍᒪᔭᖏᓐᓂᒃ ᐱᒻᒪᕆᐅᔪᓄᑦ ᐋᕐᕿᓱᐃᓂᕐᒧᑦ ᓯᕗᓂᑦᓴᖓᓂᒃ ᐃᓪᓗᖃᕐᓂᐅᑉ ᓄᓇᕕᒻᒥ.

ᑐᖓᓕᖏᑦ ᐊᐱᕐᓲᑎᑦ, ᑐᓂᔭᐅᓚᐅᔪᑦ ᐃᓚᐅᖃᑕᐅᔪᓄᑦ ᐅᑭᐊᖓᓂ 2023, ᖃᐅᔨᓴᓚᐅᕐᑐᑦ ᑕᑯᒥᓇᕐᓂᖏᓐᓂᒃ ᐊᒻᒪᓗ ᐊᕙᓗᖏᓐᓂᒃ ᐃᓪᓘᑉ, ᐱᒻᒪᕆᓐᓂᒃ ᖃᐅᔨᑎᑦᓯᓱᑎᒃ ᐃᓪᓗᒥᒃ ᐊᑦᑕᑐᕐᑐᑦ ᐱᒍᒪᔭᖏᑦᑕ ᓯᕗᓪᓕᐅᔭᐅᖁᔭᖏᑦᑕᓗ ᒥᑦᓵᓄᑦ.

ᐱᒻᒪᕆᐅᓂᖏᑦ ᑐᖓᓕᖏᑦᑕ ᐊᐱᕐᓲᑏᑦ – ᐃᓪᓗᓯᓐᓂ

ᑰᑦᔪᐊᖅ ᓄᓇᓕᐅᖏᓐᓇᑎᓪᓗᒍ ᐊᒥᓲᓂᕐᐹᓂᒃ ᐃᓚᐅᖃᑕᐅᔪᖃᕐᓱᓂ, ᐊᖏᓕᒋᐊᕐᓯᒪᔪᖅ ᓄᓇᕕᒻᒥ ᐃᓚᐅᓂᖅ ᑕᒃᑲᓂ ᑐᖓᓕᖓᓂ ᐊᐱᕐᓲᑏᑦ, ᑕᒪᓐᓇ ᓇᓗᓀᕐᓯᔪᖅ ᐊᒥᓱᖕᖑᕙᓪᓕᐊᓂᖏᓐᓂᒃ ᐅᓇᒻᒥᓱᑦᑐᑦ ᐃᓚᐅᓂᕐᒧᑦ ᐃᓪᓗᓂᒃ ᐱᐅᓯᒋᐊᕆᕙᓪᓕᐊᓂᕐᒥ.

1. ᐃᓪᓗᐃᑦ ᓴᓇᒻᒪᖏᑦ: ᑭᐅᒍᑎᕕᓃᑦ ᓄᐃᑦᓯᓚᐅᕐᑐᑦ ᐊᖏᔪᒻᒪᕆᒻᒥᒃ ᐱᒍᒪᓂᕐᓴᐅᓂᖏᓐᓂᒃ ᓄᑖᖑᓂᕐᐹᒥᒃ (35%) ᐊᒻᒪᓗ ᓴᓇᒻᒪᑐᖃᕐᒥᒃ (34%) ᐃᓪᓗᐃᑦ ᓴᓇᒻᒪᖏᓐᓂᒃ ᓄᐃᑕᒌᕐᑐᓂ ᓴᓇᒻᒪᓂ ᐱᑕᖃᕐᓂᐹᓂ ᓄᓇᕕᒻᒥ, ᐆᑦᑑᑎᒋᓗᒋᒃ ᒫᓐᓇᓂᑕᐅᓂᕐᐹᖅ ᓄᓇᕕᒻᒥᐅᓯᐅᑎ ᓴᓇᒻᒪᖅ (2%) ᐅᕝᕙᓘᓐᓃᑦ ᓄᓇᕕᒻᒥᐅᓯᐅᑎ ᓴᓇᒻᒪᒻᒪᖅ ᐊᑐᕐᑕᕕᓂᖅ ᐊᕐᕌᒍᖅ 2000-ᖑᓚᐅᕐᑎᓇᒍ (16%).

2. ᓯᓚᒥ ᐊᑭᓐᓀᑦ: ᑭᐅᔪᑦ ᐅᖃᕐᑐᕕᓃᑦ ᐱᐅᑦᓴᓂᕐᓴᐅᓂᕋᕐᓱᑎᒃ ᑕᐅᑦᑐᖃᓪᓗᐊᖏᑦᑐᓂᒃ ᑕᐅᑦᑐᓂᒃ (70%) ᑕᐅᑦᑐᕆᑦᑐᓂᖔᖑᖕᖏᑐᖅ (30%) ᐃᓪᓘᑉ ᓯᓚᑎᖏᓐᓄᑦ ᐊᑭᓐᓇᓄᑦ, ᐃᓱᕐᑕᖅ ᐱᐅᒋᔭᐅᓂᕐᐸᐅᑎᓪᓗᒍ (46%), 14-ᓂᑦ ᑕᐅᑦᑐᖃᓪᓗᐊᖏᑦᑐᓂᑦ ᐊᒻᒪᓗ ᑕᐅᑦᑐᕆᑦᑐᓂᑦ ᓇᓪᓕᑳᕋᑦᓴᓂᑦ.

3. ᐃᓪᓗᕈᓘᑉ ᖃᓄᐃᓕᖓᓂᖏᑦ: ᐃᓪᓗᒥᒃ ᐊᑦᑕᑐᕐᑐᑦ ᐃᑉᐱᒋᔭᐅᖁᔨᓗᐊᖕᖑᐊᓚᐅᕐᑐᑦ ᐱᒻᒪᕆᐅᓂᖓᓂᒃ ᐃᓪᓗᕈᓘᑉ ᐊᖏᓂᖓᑕ (86%), ᐊᖏᓂᕐᓴᒥᒃ ᐅᕝᕙᓘᓐᓃᑦ ᒪᕐᕈᕕᓪᓗᐊᑐᒥᒃ ᐅᒃᑯᐊᖃᕐᓗᑎᒃ (86%), ᐊᒻᒪᓗ ᐃᑯᒪᓄᑦ ᐱᑐᑦᓯᒪᓗᑎᒃ (66%). ᐱᓗᐊᕐᑐᒥᒃ, ᓄᑖᓕᒫᑦ ᐃᓪᓗᕈᓗᐃᑦ ᓴᓇᔭᐅᓯᒪᔪᑦ ᖃᒻᒥᖅ ᐃᑯᒪᒧᑦ ᐱᑐᑦᓯᒪᔪᑦ.

4. ᐃᓪᓘᑉ ᐃᓚᒋᐊᕈᑎᖓ: 50%-ᖏᑦ ᑭᐅᔪᑦ ᐅᖃᕐᑐᕕᓃᑦ ᐱᒍᒪᓂᕐᓴᐅᓂᕐᒥᓂᒃ ᓇᑦᓯᑎᒥᒃ ᐊᖏᔪᒥᒃ ᐊᑕᔪᒥᒃ ᑐᕐᓲᒧᑦ, ᓄᐃᑕᓪᓗᐊᖏᑦᑐᒥᒃ ᓯᓚᒥ ᐃᓂᖃᕐᑎᓯᔪᒥᒃ. ᐊᓯᖏᑦ ᓇᓪᓕᑳᕋᑦᓭᑦ ᐃᓚᖃᓚᐅᔪᑦ ᑐᕐᓲᒥᒃ ᐊᖏᓕᒋᐊᕆᓂᖅ (24%), ᖁᓛᓂ ᓇᑦᓯᑎ (16%), ᐊᒻᒪᓗ ᓇᑦᓯᑎ ᐊᖏᔪᖅ ᐃᓪᓘᑉ ᑐᓄᐊᓂ (8%).

5. ᐃᓃᑦ ᐊᒥᓱᓄᑦ ᐊᑐᕐᑕᐅᔪᑦ: ᐃᓪᓗᒥᒃ ᐊᑦᑕᑐᕐᑐᑦ ᐅᖃᕐᑐᕕᓃᑦ ᐊᓯᒥᓂᒃ ᐊᑐᖃᑎᖃᕈᒪᓂᕐᒥᓂᒃ ᐃᓱᕐᕉᑎᓂᒃ ᐆᑦᑑᑎᒋᓗᒋᒃ ᓴᓇᕕᒃ (67%) ᐊᒻᒪᓗ ᓇᑦᓯᑏᑦ (58%), ᑖᒃᑯᐊ ᐃᓱᕐᕉᑏᑦ ᐃᓪᓘᑉ ᓴᓂᕌᓃᑐᐊᕐᐸᑕ ᐊᒻᒪᓗ ᑐᑭᑖᕈᓐᓇᕈᑎᒃ ᑭᓇᒃᑯᓂᒃ ᐊᑐᖃᑎᖃᓚᖓᒻᒪᖔᕐᒥᒃ. ᑭᓯᐊᓂ, ᑭᐅᔪᑦ ᐃᓪᓗᕈᓗᒻᒥᓂᒃ ᐊᓯᒥᓄᑦ ᐊᑐᕐᑕᐅᖁᔨᓪᓗᐊᓚᐅᔪᖕᖏᑐᑦ (47%).

 6. ᐃᖏᕐᕋᐅᑏᑦ ᓄᕐᖃᖓᕕᖏᓐᓂᒃ ᑭᖕᖒᒪᑦᓯᓃᑦ: 75%-ᖏᑦ ᑭᐅᔪᑦ ᐅᖃᕐᑐᕕᓃᑦ ᑭᖕᖒᒪᑦᓯᓂᕐᒥᓂᒃ ᐃᖏᕐᕋᐅᑏᑦ ᓄᕐᖃᖓᕕᖏᓐᓂᒃ ᐃᑭᓐᓂᐸᐅᑎᓪᓗᒋᑦ ᐱᖓᓱᓄᑦ ᐃᖏᕐᕋᐅᑎᓄᑦ ᐃᓪᓗᖓᑕ ᓴᓂᐊᓂ, ᐃᓚᖃᕐᓱᑎᒃ ᓄᓇᒃᑰᔫᓂᒃ ᒥᑭᓂᕐᓴᓂᒃ, ᓄᓇᒃᑰᔫᓂᒃ ᐅᓯᕕᓕᓐᓂᒃ, ᓯᑭᑑᓂᒃ, ᓯᑕᒪᓕᓐᓂᒃ, ᐅᒥᐊᕐᓂᒃ, ᐊᒻᒪᓗ ᒪᕐᕈᓕᓐᓂᒃ. ᐊᔪᒉᑦᑐᖅ, 41%-ᖏᑦ ᓇᓗᓀᕐᓯᓂᕐᒪᑕ ᐅᒃᑯᐃᖔᕆᐊᒥᒃ ᐊᓯᖏᓐᓂᒃ ᐃᖏᕐᕋᐅᑎᓄᑦ ᓄᕐᖃᖓᕕᓐᓂᒃ ᐊᑐᕆᐊᒥᒃ.

ᐋᕐᕿᓯᒪᓂᐅᖁᔭᐅᔪᑦ ᐊᒥᓱᐃᖃᐅᑎᒥ ᐃᓪᓗᖃᕐᓂᒧᑦ

ᑭᐅᔪᑦ ᐊᐱᕆᔭᐅᓚᐅᔪᒻᒥᔪᑦ ᐱᑦᔪᑎᓂᒃ ᐱᒍᒪᓕᓚᕿᒍᑎᒋᒐᔭᕐᑕᖏᓐᓂᒃ ᐃᓪᓗᖃᕐᓂᒥᒃ ᐊᒥᓱᐃᖃᐅᑎᒥ. ᐊᒥᓲᓂᕐᓭᑦ ᐅᖃᕐᑐᕕᓃᑦ ᑭᖕᖒᒪᑦᓯᓂᕐᒥᒃ ᓴᓂᕐᕓᒪᕕᒋᐊᓪᓚᓂᒃ (61%), ᐊᖏᓂᕐᓴᒥᒃ ᐃᒪᖃᐅᑎᒥᒃ/ᐊᓇᖃᐅᑎᒥᒃ (56%), ᓯᓚᑖᓂᑦ ᐱᔪᒥᒃ ᓱᕐᕙᓛᖕᖏᓂᕐᓴᒥᒃ (57%), ᐊᒻᒪᓗ ᓱᐴᕈᓯᔭᕆᐊᖃᖕᖏᓂᕐᒧᑦ ᒪᓕᒐᖅ (43%). ᖃᐅᔨᒪᔭᐅᒋᐊᓕᒃ ᓱᐴᕈᓯᔭᕆᐊᖃᖕᖏᓂᕐᒧᑦ ᒪᓕᒐᖅ ᐊᑐᕐᑕᐅᓕᕐᒪᑦ ᓄᑖᓕᒫᓄᑦ ᐃᓪᓗᓄᑦ ᓴᓇᔭᐅᓯᒪᔪᓄᑦ 2022-ᓂᑦ.

ᒪᑭᕝᕕᒃ ᑐᓂᒪᔪᖅ ᐊᑐᓕᕐᑎᓯᓂᕐᒧᑦ ᐊᓯᑦᔨᑕᐅᒍᓐᓇᑐᓂᒃ

ᐃᓗᐃᑦᑐᖅ ᑐᓴᕐᑎᓯᒍᑎ ᐊᐱᕐᓲᑎᓂᒃ ᑭᐅᒪᒍᑎᓅᓕᖓᔪᖅ ᐁᑦᑑᑎᐅᓯᒪᓕᕐᑐᖅ ᐱᓇᓱᐊᖃᑎᑦᑎᓄᑦ ᒪᑭᕝᕕᒥ. ᕿᒥᕐᕈᓚᖓᔪᑦ ᐅᖃᐅᓯᐅᔪᕕᓂᕐᓂᒃ ᐊᒻᒪᓗ ᐊᑐᓕᕐᑎᓯᓗᑎᒃ ᐊᓯᑦᔨᒋᐊᕈᑎᐅᑐᐃᓐᓇᕆᐊᓕᓐᓂᒃ ᑐᖕᖓᕕᖃᕐᓗᑎᒃ ᐃᓱᒪᒋᔭᕕᓂᖏᓐᓂᒃ ᐃᓪᓗᒥᒃ ᐊᑦᑕᑐᕐᑐᑦ.

ᑐᑭᓯᔭᐅᔪᑦ ᑕᒃᑲᖓᑦ ᑐᖓᓕᖓᓂᑦ ᐊᐱᕐᓲᑏᑦ ᐊᑑᑎᖃᓪᓚᕆᑦᑐᑦ, ᑐᑭᓯᓇᕐᑎᓯᒐᒥᒃ ᐃᓪᓗᒥᒃ ᐊᑦᑕᑐᕐᑐᑦ ᐱᒍᒪᓂᕐᓴᖏᓐᓂᒃ ᑭᖕᖒᒪᒋᔭᖏᓐᓂᓗ, ᐃᑲᔪᕐᓂᖃᓪᓚᕆᓚᖓᑦᓱᑎᒃ ᓯᕗᓂᑦᑎᓂ ᐱᐅᓯᒋᐊᕆᓂᐅᔪᓂᒃ ᐃᓅᓯᕐᒥᒃ ᐊᒻᒪᓗ ᓄᓇᓖᑦ ᓈᒻᒪᓴᕐᓂᖏᓐᓂᒃ ᓄᓇᕕᓕᒫᒥ.