ᓄᓇᕕᒻᒥ ᐃᓪᓗᓕᕆᔨᒃᑯᑦ ᐊᓪᓚᕕᖓ ᑐᓴᕐᑎᓯᒍᑎᖃᕐᖁᖅ ᑎᒃᑯᐊᑕᐅᓂᖓᓂᒃ ᑐᑭᒧᐊᑦᑎᓯᔨᒻᒪᕆᐅᑉ ᓄᑖᑉ
ᐆᒃᑑᐱᕆ 8, 2024, ᑰᑦᔪᐊᖅ ᓄᓇᕕᒻᒥ, ᑯᐯᒻᒥ – ᐊᖓᔪᕐᖄᖓ ᑲᑎᒪᔨᖏᑦᑕ ᐃᓪᓗᓕᕆᔨᒃᑯᑦ ᓄᓇᕕᒻᒥ, ᓵᒥ ᑕᓐᑲᓐ, ᑐᓴᕐᑎᓯᒍᑎᖃᕐᖁᖅ ᓄᑖᒥᒃ ᑎᒃᑯᐊᑕᐅᔪᒥᒃ ᓗᐯᖕ ᑌᖒᒥᒃ ᐱᓇᓱᕝᕕᐅᑉ ᑐᑭᒧᐊᑦᑎᓯᔨᒻᒪᕆᑦᑖᖓᓂᒃ. ᐱᓇᓱᐊᒻᒪᕆᓚᐅᕐᓱᑎᒃ ᑎᒃᑯᐊᓯᒐᓱᐊᕐᓂᒧᑦ, ᑎᒃᑯᐊᓯᔩᑦ ᑲᑎᒪᔨᖏᑦ ᒪᓂᔨᓚᐅᕐᐳᑦ ᐱᓇᓱᒐᕐᒥᒃ ᑌᖒᒧᑦ, ᒫᓐᓇᓯᐅᑎᐅᑦᓱᓂ ᑲᒪᔨᒻᒪᕆᐅᖃᑦᑕᑐᖅ ᑐᑭᒧᐊᑦᑎᔨᐅᑦᓱᓂᓗ, ᐃᓪᓗᓕᕆᓂᕐᒥ ᓄᑕᐅᓯᓕᕐᑎᕆᓂᕐᒥᓗ ᐃᓪᓗᓕᕆᔨᒃᑯᓂ ᓄᓇᕕᒻᒥ.
“ᐊᖓᔪᕐᖄᖑᑦᓱᖓ ᑲᑎᒪᔨᓂ, ᑐᖕᖓᓱᑦᑎᓯᕗᖓ ᑌᖒᒥᒃ ᐱᓇᓱᒐᕐᑖᖃᒻᒥᖓᓂ ᓂᓪᓕᕈᑎᖃᕐᓗᖓᓗ ᓇᓗᕐᖁᑎᖕᖏᓂᕋᓂᒃ ᑖᑦᓱᒥᖓ. ᐱᓇᓱᖃᑎᒌᓐᓂᕆᓂᐊᕐᑕᕗᓐᓂᒃ ᐊᑯᓂᐅᑦᓴᖁᖓ ᐱᓇᓱᖃᑎᖏᓐᓂᓗ ᑕᒪᑦᓱᒥᖓ ᐱᓪᓚᕆᐅᑦᓱᓂ ᓱᓇᐅᓂᖓᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓅᓕᖓᔪᓄᑦ ᐃᓪᓗᓖᑦ,” ᐅᖃᕐᑐᖅ ᑕᓐᑲᓐ. ᑐᑭᒧᐊᑦᑎᓯᔨᒻᒪᕆ ᓄᑖᖅ ᐅᐱᒍᓱᑉᐳᖅ ᐱᕕᑦᓴᖃᕐᓂᒧᑦ ᐃᑲᔪᕐᓯᒪᓂᐊᕐᓂᒥ ᐱᐅᓯᒋᐊᕐᑎᓯᓂᕐᒧᑦ ᐃᓪᓗᓕᕆᓂᕐᒥᒃ ᓄᓇᕕᒻᒥ. “ᐊᒻᒧᑎᕐᓇᑎᓪᓗᒍ, ᐅᐱᒋᓐᓇᑑᑦᓱᓂ ᑲᑦᓱᙰᓐᓇᓱᓂᓗ ᐊᖏᕈᑎᒐ ᑎᒃᑯᐊᑕᐅᕈᑎᒐᓂᒃ ᑐᑭᒧᐊᑦᑎᓯᔨᒻᒪᕆᐅᓂᐊᕐᓂᒧᑦ ᓄᓇᕕᒻᒥ ᐃᓪᓗᓕᕆᔨᒃᑯᑦ ᐊᓪᓚᕕᖓᓂ. ᐱᓇᓱᖃᑎᓕᒫᒃᑲᓂᒃ ᓇᑯᕐᒦᕈᒪᕗᖓ ᑲᑎᒪᔨᓂᓪᓗ ᐅᑉᐱᕆᔭᖃᕐᓂᖏᓐᓄᑦ ᐅᕙᓐᓂᒃ. ᐊᕐᕌᒍᓂ ᓯᑕᒪᑲᓵᓂ ᐱᓇᓱᕝᕕᒥᐅᖑᓕᕐᓱᖓ, ᐊᖏᕐᓯᒪᓂᖃᕐᖁᖓ ᐊᔪᐃᓐᓇᕈᑎᙯᓐᓇᓚᖓᓂᕐᒧᑦ ᑎᑭᐅᑎᔭᖃᕐᓂᒧᑦ ᑐᕌᒐᓱᐊᕐᑕᑎᓐᓄᑦ ᐃᓪᓗᓕᓐᓂᓗ ᓈᒻᒪᓴᑦᓯᐊᑎᑦᓯᓂᕐᒧᑦ, ᓴᐳᑎᔭᐅᑎᓪᓗᒍ ᓯᕗᓕᕐᓂᒥ ᐱᓇᓱᖃᑎᒌᑦᑎᓄᑦ ᐱᓇᓱᑦᑎᓕᒫᓄᓪᓗ ᓄᓇᕕᒻᒥ ᐃᓪᓗᓕᕆᔨᒃᑯᑦ ᐊᓪᓚᕕᖓᓂ.”
ᓗᐯᖕ ᑌᖒ ᐊᕐᕌᒍᓂ ᖁᓕᓂ ᐅᖓᑖᓄᓪᓗ ᐃᓪᓗᓕᕆᓂᕐᒦᓕᕐᑐᖅ ᑲᑦᓱᙰᑦᓯᐊᒪᕆᑦᓱᓂᓗ ᑕᒪᑦᓱᒧᖓ ᑎᓕᔭᐅᒪᐅᑎᒧᑦ. ᑕᑯᓐᓇᕈᓯᖃᕐᓂᖓ ᑐᖕᖓᕕᖃᕐᖁᖅ ᐃᓪᓕᕆᔭᖏᓐᓂᒃ ᓄᓇᕕᒻᒥ ᐃᓪᓗᓕᕆᔨᒃᑯᑦ ᐊᓪᓚᕕᖓᑕ. ᑌᒣᑦᑐᓭᓐᓇᒐᓛᓂᒃ ᐊᕐᓱᕈᓐᓇᑐᒃᑰᒍᑎᖃᓲᖑᑦᓱᑎᒃ ᐊᓯᖏᓐᓄᑦ ᐃᓪᓗᓕᕆᓂᕐᒥ ᐱᓇᓱᕝᕕᓄᑦ, ᐃᓕᑕᕐᓯᒪᕗᖅ ᐃᓱᐃᓗᑕᐅᓲᓂᒃ ᑖᒃᑯᓭᓐᓇᒐᓚᐅᓲᖑᓂᖏᓐᓂᒃ ᐱᓇᓱᖃᑎᒌᑦᓯᐊᓂᕐᒧᓗ ᓂᓪᓕᕈᑎᖃᓲᖑᑦᓱᓂ ᓯᕗᓕᖃᑎᓄᑦ.
ᑲᒪᔨᒻᒪᕆᑦᑖᖃᒻᒥᖅ ᐊᐅᓚᑦᓯᓂᓕᕆᓂᕐᒥ ᐱᓇᓱᑦᑎᓂᒃ ᐱᓇᓱᖃᑎᙯᓐᓇᓚᖓᕗᖅ ᐊᑦᔨᒌᖕᖏᑐᓄᑦ ᑎᓕᔭᐅᒪᐅᑎᓄᑦ ᐱᓇᓱᐊᕈᑕᐅᖃᑦᑕᕇᕐᑐᓄᑦ.
ᓄᓇᕕᒻᒥ ᐃᓪᓗᓕᕆᔨᒃᑯᑦ ᐊᓪᓚᕕᖓᓅᓕᖓᔪᑦ
ᓄᓇᕕᒻᒥ ᐃᓪᓗᓕᕆᔨᒃᑯᑦ ᐊᓪᓚᕕᖓ ᖄᖏᓐᓂᑯᓕᐅᕐᑎᐅᒐᓂ ᐱᓇᓱᕝᕕᐅᕗᖅ, ᐃᓪᓗᖁᑎᖃᕐᓱᓂ 4,000 ᐅᖓᑖᓄᑦ ᓴᐳᑦᔨᔭᐅᒪᑦᓱᓂᓗ ᐊᖏᕐᓯᒪᓂᕐᑕᓕᓐᓄᑦ ᐱᓇᓱᖃᑎᒌᓄᑦ 250-ᒐᓛᓄᑦ (75%-ᖏᑦ ᐃᓄᑐᐃᓐᓀᑦ), ᓄᓇᓕᓐᓃᓱᑎᒃ 14-ᓂ ᐊᓪᓚᕕᓐᓂ, 98%-ᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᐅᑦ ᐃᓪᓗᖃᕐᑎᓱᒋᑦ ᐃᓱᕐᕿᓇᕐᑐᓂᒃ, ᐊᑦᑕᓇᕋᑎᒃ ᐊᑭᑐᔫᒐᑎᓗ, ᓈᒻᒪᓯᓕᕐᓯᒪᔪᑦ ᑭᖕᖒᒪᒋᔭᖏᓐᓄᑦ ᐃᓗᖁᓯᖃᓄᓪᓗ.
ᖃᓄᑐᐃᓐᓇᖅ ᑐᑭᓯᒋᐊᕈᒪᓐᓂᕈᕕᑦ, ᐅᑯᓅᖓ ᐅᖃᕐᕕᖃᕐᓗᑎᑦ:
ᐸᑦᕆᔅ ᓭᖕ-ᐊᒨᕐ
ᑐᓴᐅᒪᖃᑎᒌᓐᓂᒥ ᑐᑭᒧᐊᑦᑎᓯᔨ
819-964-2000, ext. 276
ᒪᐅᑦ ᐳᑦᓯᔨᐊᑦ
ᑐᓴᐅᒪᖃᑎᒌᓐᓂᓕᕆᔭᔨ
819-964-2000, ext. 227