ᐊᑦᑕᑐᕐᑏᑦ
ᐊᑦᑕᑐᕈᑎᓂᒃ
ᐊᑭᓕᕐᑐᐃᓂᖅ
ᐃᓚᐅᑎᑦᓯᓂᖅ
- ᐊᑦᑕᑐᕐᓂᒧᑦ ᐊᖏᖃᑎᒌᒍᑎ: ᐊᑎᓕᐅᕐᓯᒪᔪᖅ ᐊᖏᖃᑎᒌᒍᑎ ᓇᓗᓀᕐᓯᔪᖅ ᐊᑦᑕᑐᕐᓂᒧᑦ ᑐᑭᓯᑎᑦᓯᒍᑎᓂᒃ, ᐊᑦᑕᑐᕈᑏᑦ ᖃᑦᓯᐅᓂᖏᓐᓂᒃ, ᐊᒻᒪᓗ ᐊᑦᑕᑐᕐᑎᐅᑉ ᑲᒪᒋᒋᐊᓕᖏᓐᓂᒃ, ᐃᓚᐅᑎᓪᓗᒋᑦ ᐋᕐᕿᒋᐊᕆᒍᑏᑦ, ᖃᐅᔨᓴᕐᓃᑦ ᐊᒻᒪᓗ ᓄᑕᐅᓯᓕᕐᑕᐅᒍᑎᖏᑦ ᖃᓄᐃᑦᑑᒥᖏᑦ.
- ᐋᕐᕿᒋᐊᕆᐊᓕᓐᓄᑦ ᖃᐅᔨᑎᑕᐅᒍᑏᑦ: ᐊᑦᑕᑐᕐᑏᑦ ᑐᓴᕐᑎᓯᒋᐊᓖᑦ ᐋᕐᕿᒋᐊᕐᑕᐅᒋᐊᓕᓐᓄᑦ ᐃᓪᓗᓕᕆᔨᒃᑯᓂ ᑲᒪᔨᒧᑦ.
- ᐊᑭᓕᕐᑐᐃᓂᖅ ᐊᑭᓖᒋᐊᖃᓕᑐᐊᕈᓂ: ᐊᑦᑕᑐᕈᑎ ᐃᓘᓐᓇᖓ ᐊᑭᓕᕐᑕᐅᒋᐊᓕᒃ ᑕᕐᕿᐅᑉ ᐱᒋᐊᖕᖓᓂᖓᓂ ᑕᒫᑦ.
- ᑐᕌᕈᑎᖓᑕ ᐊᑦᓯᔨᓂᖓ: ᐊᑦᑕᑐᕐᑎ ᖃᐅᔨᑎᑦᓯᒋᐊᓕᒃ ᐊᓪᓚᑖᕐᕕᒥᒃ, ᑲᕙᒪᒃᑯᓂ ᐱᓇᓱᑦᑎᓂᒃ ᐊᒻᒪᓗ ᐃᒻᒪᖃᐅᑎᖃᕐᕕᒥᓂᒃ ᑐᕌᕈᑎᖓ ᐊᓯᑦᔨᑐᐊᕐᐸᑦ.
- ᐃᒻᒪᖃᐅᑎ: NHB-ᑯᑦ ᐅᖃᐅᑦᔩᕗᑦ ᐊᑦᑕᑐᕐᑎᓂᒃ ᓵᑕᐅᑐᐃᓐᓇᕆᐊᖃᕐᓂᒧᑦ ᐃᒻᒪᖃᐅᑎᑖᕆᐊᖃᕐᓂᖏᓐᓂᒃ ᐃᑲᔪᕐᓯᒍᑎᓂᒃ ᐃᑯᐊᓪᓚᑐᖃᑐᐊᕐᐸᑦ, ᑎᓪᓕᒐᕐᑕᐅᐸᑕ ᐊᒻᒪᓗ ᐊᓯᐅᔨᔭᒥᓄᑦ ᐊᑭᓕᕐᑕᐅᒍᑎᑦᓴᖏᓐᓄᑦ ᐃᑯᐊᓪᓚᑐᐊᕐᐸᑕ, ᐱᓂᕐᓗᐊᕿᑐᐊᕐᐸᑕ ᐅᕝᕙᓘᓐᓃᑦ ᑐᖁᑉᐸᑕ.
ᐊᑦᑕᑐᕈᑎ ᐊᑭᓕᕐᑕᐅᒋᐊᓕᒃ ᐃᓘᓐᓇᖓ ᑕᕐᕿᐅᑉ ᐱᒋᐊᕐᓂᖓᓂ ᑕᒫᑦ
ᐊᑦᑕᑐᕈᑎᐅᑉ ᐋᕐᕿᑕᐅᓂᖓ
ᒪᓕᑦᓱᒋᑦ ᑮᓇᐅᔭᓕᐊᖏᑦ ᐊᑦᑕᑐᕐᑎᐅᑉ ᐊᒻᒪᓗ ᖃᓄᐃᓕᖓᓂᖏᑦ ᐃᓪᓗᒥᐅᖃᑎᖏᑦᑕ, ᐅᑯᓂᖓᓗ ᐃᓚᖃᕐᓱᑎᒃ:
- ᐃᒃᓗᕆᔭᖓ
- ᐃᑯᒪᒍᑎᖏᑦ ᐊᒻᒪᓗ ᐅᕐᖂᒍᑎᖓ
- ᐋᕐᕿᓯᒪᑎᑦᓯᓂᖅ ᐊᒻᒪᓗ ᐋᕐᕿᒋᐊᕐᑕᐅᒍᑎᖏᑦ
- ᓄᑕᐅᓯᓕᕐᑕᐅᓂᖅ
- ᑲᕙᒫᐱᒃᑯᓄᑦ ᑖᒃᓯᔭᕐᓂᖅ ᑕᕐᕋᒥ ᓄᓇᓕᖓᓂ ᐱᑦᔪᔨᒍᑏᑦ
- ᐃᒪᖅ ᐊᒻᒪᓗ ᐊᓇᖃᐅᑎ
- ᓴᓂᑦᑕᑕᐅᓂᖓ
- ᐊᐳᑏᔭᕐᑕᐅᓂᖓ
ᐊᑭᓖᒍᑏᑦ ᖃᓄᐃᑦᑑᓂᖏᑦ
- 14-ᓂ ᐃᓪᓗᓕᕆᔨᒃᑯᑦ ᐊᓪᓚᕕᖏᓐᓂ ᓄᓇᕕᒻᒥ, ᓄᓇᓕᑦᓯᓂ ᐱᐅᒋᔭᐅᓂᕐᓴᖅ ᐊᑭᓖᑐᐊᕈᕕᑦ
- ᓄᓇᓕᑦᓯᓂ ᑯᐊᐸᒃᑯᓂ
- ᑮᓇᐅᑦᔭᓵᑎᓐᓂ ᐲᔭᕐᑕᐅᓗᑎᒃ-ᑕᑕᕐᓴᕋᑦᓴᖅ ᐊᑐᐃᓐᓇᐅᔪᖅ ᐃᓪᓗᓕᕆᔨᒃᑯᑦ ᐊᓪᓚᕕᖓᓂ (ᖃᕆᑕᐅᔭᕐᓄᓗᒍ ).
- ᖃᕆᑕᐅᔭᑎᒍᑦ ᑮᓇᐅᔭᒃᑯᕕᒃᑯᑦ – ᐊᑭᓕᕐᑕᐅᖑᑎᓂ ᐊᑎᖓ KATIVIK MUNICIPAL HOUSING BUREAU
ᐊᑦᑕᑐᕈᑏᑦ ᐊᑭᑭᓪᓕᒋᐊᕈᑎᖏᑦ
ᑐᑭᑖᕐᓗᑎᒃ ᐱᒍᓐᓇᑐᓂᒃ ᐊᑦᑕᑐᕐᓂᒧᑦ ᐊᑭᑭᓪᓕᒋᐊᕈᑎᓂᒃ, ᐊᑦᑕᑐᕐᑏᑦ ᐅᑯᓂᖓ ᐱᑕᖃᕐᑎᓯᒋᐊᓖᑦ ᐊᓪᓚᓯᒪᔪᓂᒃ
- ᖃᐅᔨᑎᑦᓯᒍᑏᑦ ᖃᐅᔨᓴᕐᑕᐅᓂᕐᒧᑦ ᑖᒃᓯᔮᕈᑎᓄᑦ ᑯᐯᒻᒥ, 1 800 267-6299.
- T4 ᐊᓪᓚᕕᑦᓵᐱᒃ
- ᑯᐯᒻᒥ ᐃᑦᑑᒍᑎᑖᕐᑕᕈᑎᓄᑦ ᐸᕐᓇᓯᒪᐅᑎᖓᑕ ᑐᑭᓯᓇᕐᑎᓯᒍᑏᑦ
- ᓂᕿᑖᕈᑎᑖᕐᑕᕈᑏᑦ ᐅᕝᕙᓘᓐᓂᑦ ᐱᓇᓱᖕᖏᑐᓄᑦ ᐃᒻᒪᖃᐅᑎᓄᑦ ᐊᓪᓚᓯᒪᔪᑦ
ᐱᑦᔪᑏᑦ ᐃᓱᒪᒋᔭᐅᒋᐊᓖᑦ ᖃᑦᓯᐅᒐᔭᕐᓂᖏᓐᓄᑦ
- ᐅᓄᕐᓂᖏᑦ ᐱᐊᕋᖏᑦᑕ ᐃᓪᓗᒥᐅᑕᖏᑦ
- ᐃᓄᒻᒪᕆᐅᓂᖓ ᐊᑦᑕᑐᕐᑎᐅᑉ
- ᑎᒥᒥᒍᑦ ᐊᔪᕈᑎᖃᕐᓂᒧᑦ ᖃᓄᐃᓕᖓᓂᖏᑦ ᐊᑦᑕᑐᕐᑎᐅᑉ
- ᐱᒍᓐᓇᑎᑦᓯᒍᑏᑦ ᐊᑦᑕᑐᕈᑎᖓᓂᒃ ᓄᕐᖃᑎᑦᓯᓂᕐᒧᑦ
ᐊᑭᓖᒍᑎᓄᑦ ᐱᓀᓗᑌᑦ, ᑭᖑᕙᕆᐊᕐᑕᐅᓂᖏᑦ ᐊᒻᒪᓗ ᐊᑭᓖᖕᖏᓂᖅ
ᐱᓀᓗᑕᖃᕐᖀᑦ ᐊᑭᓖᓂᕐᒧᑦ ᐊᑭᓕᕆᐊᓕᑎᓐᓂᒃ?
- ᖃᐅᔨᒋᐊᕐᕕᒋᑲᐱᓗᒋᑦ ᐃᓪᓗᓕᕆᔨᒃᑯᑦ ᐊᓪᓚᕕᖓᓂ ᑐᑭᑖᕈᑎᐅᒐᔭᕐᑐᓄᑦ ᐊᑭᓕᕐᑐᐃᒍᑎᑎᓐᓄᑦ ᐊᖏᖃᑎᒌᒍᑎᓄᑦ ᐊᒻᒪᓗ ᐊᓂᑎᑕᐅᑐᐃᓐᓇᕆᐊᖃᕈᓐᓀᕈᑎᑦᓴᑎᓐᓄᑦ.
- ᐊᑦᑕᑐᕈᑏᑦ ᐊᑭᓕᕐᑕᐅᒋᐊᓖᑦ ᑕᕐᕿ ᐱᒋᐊᕐᓂᖓᓂ ᑕᒫᑦ ᑌᒣᒋᐊᖃᕐᑎᑕᐅᔪᑦ ᐃᓅᖃᑎᒌᓄᑦ ᓇᓗᓀᒃᑯᑕᖓᓄᑦ ᑯᐯᒻᒥ.
ᐱᓇᓱᐊᕐᑕᐅᓂᖓ ᐊᑭᓕᕐᑐᐃᖏᓐᓂᒧᑦ
- ᐊᑭᓖᖃᑦᑕᖏᓐᓂᖅ ᐊᑐᕐᑎᓯᓲᖅ NHB-ᒥᒃ ᐱᒋᐊᕐᑎᓯᓂᕐᒥᒃ ᐱᑦᔪᑎᐅᔪᒥᒃ ᑯᐯᒻᒥ ᐊᑦᑕᑐᕐᑏᑦ ᑲᑎᒪᔨᖏᓐᓂ ᐊᑦᑕᑐᕈᑎᖓᓂᒃ ᓄᕐᖃᑎᑕᐅᑎᑦᓯᒍᑎᒥᒃ ᐊᒻᒪᓗ ᐊᓂᑎᑦᓯᑐᐃᓐᓇᕆᐊᖃᓂᒥᓂᓪᓗ.
- ᐊᑦᑕᑐᕐᑏᑦ ᐊᑭᓕᑦᓴᓖᑦ ᐱᑖᕐᑎᑕᐅᒐᔭᕐᑐᑦ ᐊᒥᓱᓂᒃ ᐊᓪᓚᓯᒪᔪᓂᒃ NHB-ᒥ ᐱᓯᒪᔪᓂᒃ ᐊᑐᐃᓐᓇᐅᑎᑦᓯᔪᓂᒃ ᐊᑭᓕᕐᑐᐃᓂᕐᒧᑦ ᐋᕐᕿᓱᐃᒍᑎᓂᒃ ᐊᓂᑎᑦᓯᑌᓕᒐᓱᐊᕐᓂᒧᑦ.
- ᐊᖏᖃᑎᒌᓐᓂᖅ ᐋᕐᕿᑕᐅᑐᐊᕐᐸᑦ, ᐱᓇᓱᐊᕐᑕᐅᓂᖓ ᓄᕐᖃᑎᑕᐅᓲᖅ. ᑭᐅᔭᐅᖕᖏᑯᑎᒃ ᐅᕝᕙᓘᓐᓃᑦ ᐋᕐᕿᓱᐃᖕᖏᑯᑎᒃ, ᐊᓂᑎᑕᐅᓂᑦᓴᖓᑕ ᐱᓇᓱᐊᕐᑕᐅᓂᖓ ᑲᔪᓯᓚᖓᔪᖅ.
ᐊᓂᑎᑕᐅᓂᖓᑕ ᑐᑭᓯᓇᕐᑎᑕᐅᒍᑎᖓ
- ᐊᑭᓕᕋᑦᓴᓂᒃ ᑐᓂᔨᔨ ᐱᖁᔭᑎᒍᑦ ᐁᑦᑐᐃᒐᔭᕐᑐᖅ ᐊᓂᑎᑕᐅᒍᑎᓄᑦ ᖃᐅᔨᑎᑦᓯᒍᑎᓂᒃ ᐅᓪᓗᓂ ᑕᓪᓕᒪᓂ ᐊᓂᑎᑕᐅᕕᑦᓴᖓᓂ.
- ᐊᖏᕐᕋᒥ ᐊᓂᖕᖏᑐᐊᕐᐸᑦ ᐅᓪᓗᖓᓂ ᐊᓂᕕᒋᒋᐊᓕᖓᓂ, ᐊᑭᓖᑎᑦᓯᔨ ᐊᖏᕐᕋᒥᒃ ᓱᓇᒐᓚᓐᓂᒃ ᐊᓂᑎᑦᓯᒐᔭᕐᑐᖅ.
- ᐊᓂᑎᑕᐅᒌᕐᑐᕕᓂᐅᓗᑎᒃ, ᐊᑦᑕᑐᕐᑎ ᐅᑉᐱᕆᔭᐅᕐᖃᔦᒐᔭᕐᑐᖅ ᐊᒻᒪᓗ ᓴᐳᒻᒥᔭᐅᒍᓐᓀᓗᓂ NHB-ᑯᓐᓄᑦ ᐊᒻᒪᓗ ᐃᑲᔪᕐᑕᐅᒍᑎᓂᒃ ᐱᑕᖃᕋᔭᖕᖏᑐᖅ ᐅᕝᕙᓘᓐᓃᑦ ᐊᑭᓕᕐᑕᐅᒍᑎᓂᒃ.
ᑭᖑᓪᓕᐹᒥ ᐊᑐᕐᑕᐅᒐᔭᕐᑐᖅ
- ᐊᓂᑎᑦᓯᓂᖅ ᐊᑦᑕᑐᕈᑎᓂᒃ ᐊᑭᓕᑦᓴᓄᑦ NHB-ᑯᓐᓄᑦ ᑭᖑᓪᓕᐹᒥ ᐊᑐᕐᑕᐅᒐᔭᕐᑐᖅ.
- ᐊᑦᑕᑐᕐᑏᑦ ᐊᒥᓱᓂᒃ ᐱᒍᓐᓇᓂᓖᑦ ᐋᕐᕿᓱᐃᓗᑎᒃ ᐊᓂᑎᑦᓯᓂᖅ ᐊᑐᕐᑕᐅᓚᐅᕐᑎᓇᒍ.
ᐊᑦᑕᑐᕐᓂᒧᑦ ᐊᓪᓚᓯᒪᔪᖏᑦ
ᐊᑦᑕᑐᕈᑎᒧᑦ ᐊᖏᖃᑎᒌᒍᑎ ᐊᑐᕐᑕᐅᓲᑦ NHB-ᑯᓐᓄᑦ ᐊᖏᕐᑕᐅᒪᔪᖅ ᑯᐯᒻᒥ ᐃᓪᓗᓕᕆᓂᕐᒧᑦ ᑯᐊᐳᕇᓴᒧᑦ (SHQ) ᐃᓪᓗᓕᕆᔨᒃᑯᑦ ᐃᒃᓗᖁᑎᖏᓐᓄᑦ ᐋᕐᕿᓱᕐᑕᐅᒪᔪᑦ ᓄᓇᕕᒻᒥᐅᓄᑦ. ᐊᕐᕌᒍᒧᑦ ᐊᑕᐅᓯᕐᒨᓕᖓᔪᖅ ᔪᓓ 1-ᒥᑦ ᔫᓂ 30-ᒧᑦ ᐊᕐᕌᒍᓕᒫᒧᑦ. ᐊᑎᓕᐅᕐᑕᐅᑐᐊᕈᑎᒃ ᐅᓪᓗᖓᓂ ᐊᓯᐊᓂ ᔪᓓ 1, ᐃᓱᓕᓂᖓ ᐊᑦᑕᑐᕐᓂᒧᑦ ᐊᖏᖃᑎᒌᒍᑎᐅᑉ ᐃᓱᓕᕋᔭᕐᑐᖅ ᔫᓂ 30-ᒥ.
ᓄᑕᐅᓯᓕᕐᑕᐅᓂᖓ
ᐊᖏᖃᑎᒌᒍᑎᐅᑉ ᐊᑦᑕᑐᕐᓂᒧᑦ ᓄᑕᐅᓯᓕᕐᑕᐅᓂᖓ ᐊᐅᓪᓚᑎᑕᐅᓲᖅ ᐊᓪᓚᓯᒪᑎᓪᓗᒍ ᒫᑦᔨ 31-ᖑᓚᐅᕐᑎᓇᒍ ᐊᕐᕌᒍ ᑕᒫᑦ.
ᓄᕐᖃᑎᑕᐅᓂᖓ
ᐊᑦᑕᑐᕐᑏᑦ ᓄᕐᖃᑎᑦᓯᒍᒪᔪᑦ ᐊᖏᖃᑎᒌᒍᑎᒥᓂᒃ ᖃᐅᔨᑎᑦᓯᒋᐊᓖᑦ ᓄᓇᓕᒻᒥᓂ ᐃᓪᓗᓕᕆᔨᒃᑯᑦ ᑲᒪᔨᖓᓂᒃ, ᐊᑎᓕᐅᕐᓗᓂ ᓄᕐᖃᑎᑦᓯᒍᑎᒥᒃ ᑕᑕᕐᓴᕋᑦᓴᒥᒃ, ᐊᒻᒪᓗ ᐃᑉᐱᒍᓱᑦᓯᐊᓗᓂ ᕿᒪᑦᑕᒥᓂᒃ ᐃᒃᓗᒥᒃ ᖃᓄᐃᑦᑑᓂᕕᓂᖓᓄᑦ ᓅᕝᕕᒋᒋᐊᖕᖓᓱᒍ.
ᑐᑭᖏᑦ
ᐊᑎᓕᐅᕐᓯᒪᓗᑎᒃ ᐊᖏᖃᑎᒌᒍᒥᒃ, ᐊᑦᑕᑐᕐᑎ ᐊᖏᕐᑐᖅ ᒪᓕᑦᓯᐊᓚᖓᓂᕐᒥᓂᒃ ᐊᑦᑕᑐᕈᑎᐅᑉ ᐊᖏᖃᑎᒌᒍᑎᖓᓂᒃ ᐊᒻᒪᓗ ᐊᑭᓖᖃᑦᑕᓗᓂ ᐊᑦᑕᑐᕈᑎᒥᓂᒃ ᑕᕐᕿ ᑕᒫᑦ.
ᑭᖑᕃᔪᖅ ᐊᑦᑕᑐᕈᑎ
ᓄᕐᖃᑎᑕᐅᓂᖓ ᐊᒻᒪᓗ ᐊᖏᖃᑎᒌᒍᑎᒧᑦ ᐊᑦᑕᑐᕈᑎᒧᑦ ᓅᓐᓂᖓ ᐊᑭᓕᕆᐊᑐᖕᖏᑐᑦ ᑭᖑᕃᓂᖓᓄ ᐊᑦᑕᑐᕈᑎᒧᑦ
ᐋᕐᕿᓱᕐᑕᐅᒋᐊᓖᑦ
ᑐᓴᕐᑎᓯᑦᓴᐅᑎᒋᓂᖅ
ᐊᑦᑕᑐᕐᑎ ᖃᐅᔨᑎᑦᓯᓴᐅᑎᒋᒋᐊᓕᒃ ᓄᓇᓕᒻᒥᓂ ᐃᓪᓗᓕᕆᔨᒃᑯᑦ ᑲᒪᔨᖓᓂᒃ ᓱᒃᑯᖓᔪᓂᒃ ᓱᒃᑯᕆᐊᓪᓚᖏᓐᓂᖏᓐᓂ ᖃᓄᐃᓕᖓᓂᖏᑦ. ᑕᑯᓂᐊᕐᓗᓂ NHB-ᑯᑦ ᐊᓪᓚᕕᖓᓂ ᐃᑲᔪᕐᑕᐅᒍᒪᓗᓂ ᐅᕝᕙᓘᓐᓃ ᖃᕆᑕᐅᔭᒨᔦᓗᓂ ᐊᑦᑕᑐᕐᑎᐅᑉ ᒪᓕᒐᖏᓐᓂᒃ ᐅᕙᓂ ᐋᕐᕿᓱᐃᓂᕐᒧᑦ ᖃᓄᐃᓘᕆᐊᖃᕐᓂᖏᓐᓄᑦ ᐊᒻᒪᓗ ᐱᐅᓕᓂᐊᒐᕐᓂᒃ ᑲᒪᒍᑎᓄᑦ ᑐᑭᓯᑎᑦᓯᒍᑏᑦ.
ᑕᑕᕐᓭᓂᖅ ᐱᓇᓱᒍᑦᔭᐅᒍᒪᒍᑎᓂᒃ
- ᖃᐅᔨᒋᐊᕐᕕᒋᓗᒍ ᐱᒍᑦᔭᐅᔪᑦ ᐱᒍᑦᔨᒍᑎᖏᑦ: ᐅᖄᓗᒋᑦ ᖃᓄᐃᓕᖓᓂᑎᑦ ᓄᓇᓕᑦᓯᓂ ᐃᓪᓗᓕᕆᔨᒃᑯᑦ ᑲᒪᔨᖓᓄᑦ.
- ᓴᓇᖁᔨᒍᑎᓕᐅᕐᓂᖅ: ᓴᓇᖁᔨᒍᑎ ᐁᑦᑑᑎᐅᒐᔭᕐᑐᖅ ᐋᕐᕿᒋᐊᕆᔨᓕᕆᔨᓄᑦ ᐱᓇᓱᑦᑎᓄᑦ.
- ᐱᓇᓱᑦᑕᐅᒋᐊᓖᑦ ᓯᕗᓪᓕᐅᔭᐅᒋᐊᖃᕐᓂᖏᑦ: NHB ᑐᑭᑖᕋᔭᕐᑐᖅ ᓯᕗᓪᓕᐅᔭᐅᒋᐊᓕᓐᓂᒃ ᐊᒻᒪᓗ ᖃᓄᓪᓗᐊᑎᒋᒃ ᐱᓇᓱᐊᕐᑕᐅᒋᐊᖃᕐᓂᖏᓐᓂᒃ.
- ᖃᐅᔨᓴᕐᑕᐅᓂᖓ ᐊᒻᒪᓗ ᐅᓪᓗᖁᑎᓕᐅᕐᑕᐅᓂᖏᑦ: ᓯᖁᒥᓯᒪᔪᕐᓂᐊᑏᑦ ᐱᓇᓱᑦᑏᑦ ᑕᑯᓂᐊᕋᔭᕐᑐᑦ ᐊᓂᕐᕋᓄᑦ ᖃᐅᔨᓴᕐᓗᑎᒃ ᐊᒻᒪᓗ ᐅᓪᓗᖁᑎᓕᐅᕐᓗᑎᒃ ᓴᓇᔭᐅᓂᑦᓴᖓᓄᑦ.
- ᑐᓴᐅᒪᒐᓱᐊᕆᑦ: ᖃᐅᔨᓴᕐᕕᒋᖃᑦᑕᓗᒍ ᐃᓪᓗᓕᕆᔨᒃᑯᓂ ᑲᒪᔨ ᖃᐅᔨᓴᕐᓗᑎᑦ ᖃᓄᐃᓘᓕᕐᓂᖏᓐᓂᒃ ᐱᓇᓱᐊᕐᑕᒥᓂᒃ.
ᓱᒃᑯᑎᑦᓯᑌᓕᓂᕐᒧᑦ ᓴᓇᒋᐊᓪᓛᓂᕐᒧᑦ ᐱᓇᓱᐊᕐᑕᐅᔪᖅ
- NHB ᐃᓪᓗᓕᕆᔨᒃᑯᑦ ᓯᖁᒥᓯᒪᔪᕐᓂᐊᑎᖏᑦ ᐱᓇᓱᐊᓲᑦ ᖃᐅᔨᓴᕐᑕᐅᑲᑦᑕᓲᑦ ᓱᒃᑯᑲᐱᑎᑦᓯᑌᓕᑦᓱᑎᒃ ᐃᒃᓗᓂᒃ ᐊᒻᒪᓗ ᐱᐅᓯᐅᒥᑎᑦᓯᒐᓱᐊᕐᓱᑎᒃ ᐊᑦᑕᑐᕐᑏᑦ ᖃᓄᐃᖕᖏᓯᐊᕐᓂᖏᓐᓂᒃ. ᐊᑐᓂ ᐃᒃᓗᒋᔭᐅᔪᑦ ᖃᐅᔨᓴᕐᑕᐅᓂᖃᑲᓪᓛᖃᑦᑕᓚᖓᔪᑦ.
ᐃᒃᓗᒥ ᑕᐅᕐᓰᖃᑎᖃᕐᓂᖅ
ᐊᑐᕐᑕᐅᒋᐊᓖᑦ
- ᐱᒐᓱᐊᕈᑎ: ᐊᑐᓂ ᐊᑦᑕᑐᕐᑎ ᐱᒐᓱᐊᕈᒪᒍᓂ ᑕᐅᕐᓰᓂᕐᒧᑦ ᑐᓂᔨᒋᐊᓕᒃ ᐃᓪᓗᓕᕆᔨᒃᑯᓂ ᐱᒐᓱᐊᕈᑎᒧᑦ ᑕᑕᕐᓴᑕᐅᒋᐊᓕᒻᒧᑦ ᐅᑯᓂᖓ ᐱᑕᓕᒻᒧᑦ ᐊᑎᖓ ᐃᓅᑉ ᓇᓪᓕᐊᓂᒃᑕᐅᕐᓰᖃᑎᒋᒍᒪᔭᒥᓂᒃ.
- ᖃᐅᔨᓴᕐᑕᐅᓂᖓ: ᐃᓪᓗᓕᕆᓂᕐᒧᑦ ᑲᑎᒪᔨᖏᑦ ᕿᒥᕐᕈᒐᔭᕐᑐᑦ ᐱᒐᓱᐊᕈᑎᒥᒃ.
- ᐊᖏᕐᑕᐅᓂᖓᓄᑦ ᖃᐅᔨᑎᑕᐅᒍᑎᖓ: ᐃᓪᓗᓕᕆᔨᒃᑯᓂ ᑲᒪᔨᓯ ᖃᐅᔨᑎᑦᓯᒐᔭᕐᑐᖅ ᐃᓕᓐᓂᒃ ᑕᐅᕐᓰᒐᓱᐊᕐᓂᒥ ᐊᖏᕐᑕᐅᓂᖓᓄᑦ.
- ᐊᑦᑕᑐᕐᓂᒧᑦ ᐊᖏᖃᑎᒌᒍᑎ ᑲᒪᒋᔭᐅᓂᖓ: ᓅᑦᑎᑎᓚᐅᕋᓯ, ᐊᑎᓕᐅᕆᐊᖃᕐᑐᑎᑦ ᑕᒪᖏᓐᓂ ᐃᓱᓕᑎᑦᓯᒍᑎᓂᒃ ᒫᓐᓇᐅᔪᖅ ᐊᑦᑕᑐᕐᓂᒧᑦ ᐊᖏᖃᑎᒌᒍᑎᓄᑦ ᐊᒻᒪᓗ ᓄᑖᒧᑦ ᐊᑦᑕᑐᒍᑎᒧᑦ.
ᐊᓂᓂᖅ ᐃᒃᓗᒥᑦ
- ᑐᓴᕐᑎᓯᒍᑎ ᐱᑖᕆᔭᐅᒋᐊᓕᒃ: ᖃᐅᔨᑎᑦᓯᓗᑎᒃ NHB-ᑯᓐᓂᒃ ᑕᕐᕿᓕᒫᖅ ᓯᕗᓂᐊᓂ ᐱᒋᐊᕐᑎᓯᓂᕐᒧᑦ ᐊᑦᑕᑐᕈᑎᓂᒃ ᓄᕐᖃᑎᑦᓯᓂᕐᒧᑦ.
- ᕿᒥᕐᕈᔭᐅᓂᖓ: ᕿᒥᕈᓂᖃᕋᔭᕐᑐᑦ ᖃᐅᔨᑎᑦᓯᒌᑐᐊᕈᕕᑦ. ᓱᒃᑯᑕᐅᓯᒪᔪᓂᒃ ᐊᑭᓖᒋᐊᖃᕋᔭᕐᑐᑎᑦ ᐊᑐᕐᑕᐅᓂᖓᓄᑦ ᓱᒃᑯᐸᓪᓕᐊᓂᖏᑦᑕ ᐊᓯᐊᒎᕐᑐᓂᒃ.
- ᑲᒪᒋᒋᐊᓕᑎᑦ: ᐃᑉᐱᒋᑦᓯᐊᓗᒋᑦ ᐃᒃᓗᒥ ᐊᒻᒪᓗ ᑲᔪᓯᓗᑎᑦ ᐊᑭᓕᕐᑐᐃᓗᑎᑦ ᐊᑦᑕᑐᕈᑎᑎᑦ ᓄᕐᖃᖏᓐᓂᓕᒫᖏᓐᓂ.
- ᖁᐊᖃᐅᑎᒃ ᐊᒻᒪᓗ ᑭᐊᑦᓴᐅᑎᒃ: ᐱᒋᖕᖏᑯᕕᒃᑭᑦ ᑌᑲᓃᖏᓐᓇᕆᐊᓖᑦ.
- ᐊᓂᓂᕐᓄᑦ ᖃᓄᐃᓕᖓᓂᖓ: ᐃᑉᐱᒋᓗᒍ ᐃᒃᓗ ᓴᓗᒪᑦᓯᐊᒪᖔᑦ, ᐃᒋᓪᓗᒋᑦ ᓴᓂᖃᐅᑎᒨᕆᐊᓖᑦ, ᐴᕐᑐᓗᒋᑦ ᐱᐅᓕᓂᐊᒐᑎᑦ ᐊᒻᒪᓗ ᐅᑎᕐᑎᓗᒋᑦ ᐲᕈᑎᖏᑦ NHB-ᑯᓐᓄᑦ.
ᐊᑦᑕᓇᖕᖏᑐᒦᓐᓂᖅ ᐊᒻᒪᓗ ᐃᓱᕐᕆᓂᖅ
ᓱᐴᕈᓯᔭᕆᐊᖃᖕᖏᓂᕐᒧᑦ ᒪᓕᒐᖅ
- ᖃᒥᑎᕆᐅᑎᒥᒃ ᖃᐅᔨᒋᐊᕐᓂᖅ: ᖃᐅᔨᓴᑦᓴᐅᑎᒋᖃᑦᑕᓗᒍ ᖃᒥᑎᕆᐅᑎ ᑎᒍᐃᓐᓇᐅᓯᐊᕋᓗᐊᕐᒪᖔᑦ, ᐃᑯᒪᐅᑎᖃᑦᓯᐊᕋᓗᐊᕐᒪᖔᑦ, ᐊᒻᒪᓗ ᐱᒍᓐᓇᓯᐊᕋᓗᐊᕐᒪᖔᑦ. ᓇᓃᓐᓂᖓᓂᒃ ᓇᓗᓕᑦᔦᓯᐊᕐᓗᑎᑦ ᐊᒻᒪᓗ ᖃᓄᐃᓘᕐᑕᐅᒋᐊᖃᕐᓂᖓᓂᒃ.
- ᐳᕐᔪᕐᒥᒃ ᖃᐅᔨᑎᑦᓯᒍᑏᑦ ᓯᒃᑯᑎᑦᓯᑌᓕᓂᖅ: ᐃᑯᒪᐅᑎᖏᑦ ᐊᓯᑦᔨᓗᒋᑦ ᐳᔪᕐᒥᒃ ᖃᐅᔨᑎᑦᓯᒍᑎᓄᑦ ᐊᕐᕌᒍᑕᒫᑦ ᐃᑉᐱᒋᓗᒋᑦ ᑲᔪᓯᔪᒥᒃ ᓴᐳᒻᒥᒍᑎ. ᖃᐅᔨᓴᕐᓗᒋᑦ ᖃᐅᔨᑎᑦᓯᒍᑏᑦ ᑕᕐᕿᑕᒫᑦ ᐱᒍᓐᓇᓯᐊᕋᓗᐊᕐᒪᖔᑕ ᖃᐅᔨᓴᕐᓗᒋᑦ.
- ᓱᐴᕈᓯᔭᕆᐊᖃᖕᖏᓂᕐᒧᑦ ᒪᓕᒐᖅ: ᓱᐴᕐᑐᓕᒫᓂᒃ ᐱᒋᐊᖃᖕᖏᑐᖅ ᐋᖓᔮᓐᓇᑐᒐᓴᓐᓂᒃ ᐃᒃᓘᑉ ᐃᓗᐊᓂ ᓯᓚᑖᓂᓪᓘᓃᑦ ᐸᕝᕕᓇᕈᓐᓇᑐᓂ ᓯᓚᕐᖃᑎᑎᓐᓄᑦ.
- ᐱᒐᓱᐊᕐᓂᓄᑦ ᐊᑐᕐᑕᐅᒋᐊᓖᑦ: ᓯᕗᓪᓕᐹᖅ ᐃᓂᕐᑎᕆᓂᖅ – ᐅᖃᐅᓯᒃᑯᑦ; ᑐᖓᓕᖓ ᐃᓂᕐᑎᕆᓂᐅᑉ: ᐊᓪᓚᓯᒪᔪᖅ; ᑭᖑᓪᓕᐹᒥ ᐱᓇᓱᐊᕈᑎ: ᐊᓂᑎᑦᓯᓂᖅ.
- ᖃᐅᔨᒋᐊᕐᓗᑎᑦ ᑐᑭᓯᓇᕐᑎᓯᒍᑎᓂᒃ ᓱᐴᕈᓯᔭᕆᐊᖃᖕᖏᓂᕐᒧᑦ ᒪᓕᒐᕐᓂᒃ, ᐅᕝᕙᓘᓐᓃᑦ ᐅᖄᓚᓗᑎᑦ ᓄᓇᓕᑦᓯᓂ ᐃᓪᓗᓕᕆᔩᑦ ᑲᒪᔨᖓᓄᑦ.
- ᒥᖑᐊᕈᑎ ᐃᓗᐊᓂ: ᓄᑕᐅᓯᓕᖃᑦᑕᓗᒋᑦ ᐊᑭᓐᓇᑎᑦ ᐊᑐᐃᓐᓇᐅᔪᓄᑦ ᒥᖑᐊᕈᑎᓄᑦ ᖃᑯᕐᑕᓄᑦ ᐱᐅᓯᒋᐊᕐᓗᒍᓘᓐᓃᑦ ᐳᓛᕐᕕᓯ ᑕᐅᑦᑐᓕᒻᒧᑦ. ᒪᓕᑦᑕᐅᒋᐊᓕᓐᓄᑦ ᐅᕝᕙᓘᓐᓃᑦ ᖃᐅᔨᒋᐊᕈᒪᒍᕕᑦ, ᖃᐅᔨᓴᕐᓗᑎᒃ NHB-ᑯᓐᓄᑦ.
- ᐊᑭᓐᓇᒨᕆᓂᖅ: ᐊᑐᕐᓗᑎᑦ ᓂᕕᖕᖓᕈᑎᓂᒃ ᐊᒻᒪᓗ ᒥᑭᔪᓂᒃ, ᑎᕆᕐᖁᓕᓐᓂᒃ ᑭᑭᐊᓂᒃ ᓂᕕᖕᙰᓕᕈᕕᑦ ᐊᑭᓐᓇᒥᐅᑕᓂᒃ ᐊᒻᒪᓗ ᑕᕐᕋᑑᑎᓂᒃ. ᓂᐱᑦᑕᔫᓂᒃ ᓂᐱᕈᑎᓂᓪᓘᓃᑦ ᐊᑐᕈᓐᓀᓗᑎᑦ ᓱᒃᑯᑌᓕᑎᑦᓯᓂᕐᒧᑦ.
- ᓇᑎᖓ: ᐊᓯᑦᔩᓂᕐᒧᑦ ᓇᑎᖏᓐᓂᒃ ᖃᐅᔨᓴᕐᓗᑎᑦ NHB-ᑯᓐᓂᒃ ᐊᖏᕐᑕᐅᒪᖔᑕ. ᒪᓕᑦᓯᐊᒪᖔᑕ ᒪᓕᑦᑕᐅᒋᐊᓕᓐᓂᒃ ᖃᐅᔨᓴᕐᓗᑎᑦ ᐱᒋᐊᓚᐅᕐᓇᒃ.
- ᐅᒃᑯᐊᖏᑦ ᐊᒻᒪᓗ ᐃᒐᓛᖏᑦ: ᐅᒃᑯᐊᓯᒪᑎᑦᓯᐊᓗᒋᑦ ᐅᒃᑯᐊᑦ ᐊᒻᒪᓗ ᐃᒐᓛᑦ ᐅᑭᐅᒥ ᐊᒻᒪᓗ ᓯᓚᕐᓂᓗᓕᕐᐸᑦ.
- ᑭᐊᑦᓴᐅᑎ ᐊᒻᒪᓗ ᖁᐊᖃᐅᑎ: ᖁᐊᖃᐅᑏᑦ ᐊᒻᒪᓗ ᑭᐊᑦᓴᐅᑏᑦ ᐱᑕᖃᕐᑎᑕᐅᔪᑦ ᐃᓪᓗᓕᕆᔨᒃᑯᓄᑦ ᐱᒋᔭᐅᒋᓐᓇᕆᐊᓖᑦ NHB-ᑯᓐᓄᑦ. ᐊᑐᕈᓐᓇᕈᓐᓀᐸᑕ, NHB ᑲᒪᒋᒐᔭᕐᑕᖏᑦ ᐋᕐᕿᒋᐊᕐᑕᐅᓂᖏᑦ ᐱᐅᓯᒍᓐᓇᕕᓕᒫᖓᓄᑦ, ᐊᓯᑦᔨᑕᐅᕆᐊᑐᒍᓐᓀᓗᑎᒃ. ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG) ᐃᑲᔪᕐᑕᐅᒍᑎᓂᒃ ᐱᑕᖃᕐᑎᓯᔪᑦ ᐃᑲᔫᑎᐅᒐᔭᕐᑐᓂᒃ ᐃᓕᓐᓂᒃ ᓂᐅᕕᕐᓂᓴᕐᓄᑦ ᓇᒻᒥᓂᑦᓴᑎᓐᓂᒃ ᑭᐊᑦᓴᐅᑎᓂᒃ ᖁᐊᖃᐅᑎᓂᓪᓗ.
- ᐅᕝᕙᕈᑎ ᐊᒻᒪᓗ ᐸᓂᕐᓰᑎ: ᐱᑦᓯᐊᕈᓐᓇᓯᐊᖁᓪᓗᒋᑦ, ᐲᔦᓗᑎᑦ ᓴᓂᕐᓂᒃ ᐸᓂᕐᓯᑎᐅᑉ ᓴᓃᔭᕐᕕᖓᓂᑦ ᐊᒻᒪᓗ ᓴᓗᒻᒪᓴᕐᓗᒍ ᐅᕝᕙᕕᐅᑉ ᐃᓗᐊ.
- ᐅᕐᖁᓯᓴᕐᓂᖅ: ᐅᑭᐅᒥ, ᐋᕐᕿᓯᒪᑎᓗᒍ ᐅᕐᖂᓯᓴᐅᑎ 20-ᒦᑦᑎᓗᒍ. ᖃᕆᐊᕐᒥᒃ ᐊᑐᖕᖏᑯᕕᑦ, ᐅᕝᕙᓘᓐᓃᑦ ᐅᒃᑯᐃᓯᒍᕕᑦ ᐃᒐᓛᒥᒃ, ᐅᕐᖁᓯᓴᐅᑎ ᑕᐅᓄᖕᖓᕆᐊᕐᓗᒍ ᐅᕐᖂᓂᖓ 16-ᒧᑦ. ᐁᔪᖓᒍᑎᒥᒃ ᐊᑐᕐᓗᑎᑦ ᐃᓪᓗᒥᒃ ᐃᓱᐊᕐᑑᑎᑦᓯᓗᑎᑦ.
- ᐃᑯᒪᖏᑦ: ᖃᒥᑐᐊᕐᐸᑕ ᐃᑯᒣᑦ, ᖃᐅᔨᓴᕐᓗᑎᑦ ᐃᑭᒍᑎᒥᒃ ᖃᒥᒍᑎᒥᓪᓗ ᖃᓄᐃᓕᖓᓂᖏᓐᓂᒃ ᐃᑭᑦᑕᐅᑎᖏᓐᓂ ᓯᒃᑭᑖᐱᒻᒥ. ᖃᐅᔨᒪᑦᓯᐊᖏᒃᑯᕕᑦ, ᖃᐅᔨᒋᐊᕐᓗᑎᑦ NHB-ᑯᓐᓂ.
- ᑕᓚᕖᓴᒧᑦ ᖃᕆᑕᐅᔭᕈᑎᒧᓪᓗ: ᐋᕐᕿᓱᐃᓚᐅᕐᓇᒃ ᑕᓚᕖᓴᕈᑎᒧᑦ ᖃᕆᑕᐅᔭᓕᕆᒍᑎᒧᓪᓗ ᐱᐅᒃᑯᑎᓂᒃ, ᖃᐅᔨᓴᕐᖄᓗᑎᑦ ᓇᓃᒻᒪᖔᑕ ᐊᑦᓱᓈᖏᑦ ᓱᓪᓗᓕᖏᓪᓘᓃᑦ ᓱᒃᑯᐃᑌᓕᒐᓱᐊᕐᓂᒧᑦ. ᐋᕐᕿᓱᐃᓂᕐᒧᑦ Starlink ᓇᐸᔪᖓ, ᐋᕐᕿᓱᐃᑦᑌᓕᓗᑎᑦ ᓱᓇᑐᐃᓐᓇᓂᒃ ᐃᒃᓘᑉ ᖁᓛᓂ ᐃᒪᕐᑕᓰᑎᑦᓯᑌᓕᓂᕐᒧᑦ. ᖃᐅᔨᒪᑦᓯᐊᖏᒃᑯᕕᑦ ᐋᕐᕿᒋᐊᕆᓂᕐᒧᑦ, ᖃᐅᔨᒋᐊᕐᓗᑎᑦ ᑕᓚᕖᓴᒧ ᐳᒍᑕᕐᒥᒃ ᓂᐅᕕᕐᕕᕕᓂᑎᓐᓄᑦ ᐅᕝᕙᓘᓐᓃᑦ NHB-ᒥ ᖃᐅᔨᒋᐊᕐᓗᑎᒃ ᐃᑲᔪᕐᑕᐅᒍᒪᓗᑎᑦ
ᖃᐅᔨᒋᐊᑦᓯᐊᕈᒪᒍᕕᑦ ᐃᓘᓐᓇᖏᓐᓂᒃ ᓱᓇᑐᐃᓐᓇᓂᒃ ᐃᓱᕐᕆᓂᑦᓴᓄᑦ ᐊᒻᒪᓗ ᐊᑦᑕᓇᖕᖏᑐᒦᓐᓂᒧᑦ ᐊᖏᕐᕋᓂ, ᖃᐅᔨᒋᐊᕐᓗᑎᑦ NHB-ᒥ ᐊᑦᑕᑐᕐᑏᑦ ᒪᓕᒐᖏᓐᓂᒃ, ᐊᐱᕆᓗᑎᓪᓘᓃᑦ ᐊᓪᓚᕕᑦᓴᒦᑦᑐᓂᒃ ᐊᑦᔨᖏᓐᓂᒃ ᐱᑖᕈᒪᓗᑎᑦ ᐃᓪᓗᓕᕆᔨᒃᑯᑦ ᐊᓪᓚᕕᖓᓂ ᓄᓇᓕᑦᓯᓂ.
ᖃᐅᔨᒋᐊᕐᕕᒋᓗᒋᑦ ᐱᒍᑦᔨᔭᐅᔪᓄᑦ ᐱᒍᑦᔨᒍᑏᑦ
